ACARA GONDANG

=   A C A R A   G O N D A N G  =

·         Parjong-jong.

Sude Jong-jong marhaliang, siahaan di hambirang, marudut ma sude Anggina tusiamunna, jala inanta Soripada Jong-jong dipudina be.

Laos songoni ma nang Boru dohot Bere.-

·         H  A  T  A      H  U  H  U  A  S  I      N  A  T  O  R  O  P.

Hamu Amang situan natorop, Amang na liat na lolo,

Jong-jong hami dison, jumolo tangan marsantadi,

Santabi ma di humuna, hamu nahuparsangapi hami,

Marsomba hami jari sampulu, pasampulu sada simanjujung.-

Tangkas saonari hupabotohon hami, ia ulaon namion ulaon namarsintuhu,

Ndang ulaon meam-meam, Ndang ulaon Gere-gere,

Jadi unang adong Amang naguntur, unang adong Inang nagaor,

Unang adong hita marsurak,unang adong hita namengkel.-

Angka dongan, naso dapot rohana sangkap ni ulaon on,

Unang hita manggunturi, unang hita manggoari,

Denggannan dipaholang langkana, unang di inganan on,

Asa unang ala ni pangalahonta, gabe tubu parungkilon.-

Namangelek ma hami Amang, namangido ma hami Inang,

Diharadeon ni rohamuna, mangoloi pangidoan namion,

Tolopi hamu hami Amang, tungkoli hamu hami Inang,

Unang hita masipamaluan, dengganan hita masipasangapan.-

Songoni ma sahat ni hata Boa-boa Pangidoan,

Tu hita saluhut na rot u inganan on,

Siala haradeon muna mangoloi pangidoan name,

Saonari hupasahat hami, jumolo Mauliate godang.-

                                                                                                                           

        I.            M  U  L  A      G  O  N  D  A  N  G      S  I  P  I  T  U      O  M  B  A  S.

               HOLAN JONGJONG, NDANG DITORTORI

PAMINTA :          Amang Panggual Pargonsi, partarias namalo,

                                Par indahan nasuksuk, par lompan natabo,

                                Niontang sogot-sogot, nialapan botari,

                                Parling-ling narotok, Raja ni parhuhuasi,

                                Tangkas tangihon Tonggo namion, ondo alu-alu pangidoan nami,

                                Pangidoan Pasu-pasu, pangidoan sangap pangidoan tua,

                                Pangidoan Parhorasan Pardinginan, Pangidoan Hamoraon Hagabeon,

                                Sian Ompunta Mulajadi Nabolon, dihita saluhut napunguon.-

                                Dison saonari, pungu do Pinompar ni omputa Limbong Maulana,

        Ndang mardia imbar, Anak dohor boru nang  Berena,

        Satahi  saoloan, huhut masianjur,

        Naeng masipasaoran dame, asa dapot dos ni roha.-

        Ala marmula do Amang nauli, marbona do nadenggan,

        Bahen ma Gondang mamuhai Mula – Mula, ima Gondang sipitu ombas,

        Persantabian Mula somba, tu ompunta Mulajadi Nabolon,

        Na jumadihon langit dohot tano nang isina, dohot jolma manisia.-

       Alu – aluhon nang tu Dabeta Natolu, natolu suhu natolu harajaon,

       Debata Batara guru, Bala Sori dohot Bala Bulan,

       Alu – aluhon nang tu Boruspati ni tano, nang tu Habonaran nihutaon,

       Alu – aluhon nang tu angka Raja naro saian desa nauluon.-

      Asa bahen ma Amang, Mula Gondang Sipitu ombas  i,

      Parasantabian mula – mula, Mula gabe, mula Horas.-

Pargonsi :             Mambahen Gondang sipitu ombas.-

---- oooooo ----

2.

      II.            G  O  N  D  A  N  G      H  A  S  U  H  U  T  O  N

1. GONDANG MULA-MULA.

*. Sude manortor, alai holan di ingananna be.

Paminta :               Amang Panggual pargonsi, Partarias namalo,

                                Parling-ling narotok, Raja ni parhuhuasi,

                                Ling-ling ma sian Ting-ting, ampehon tu Gordang bolon,

                                Asa ting-ting barita gabe barita horas, dihita sasude,

                                Jala bolon ma Pasu-pasu jaloonta, sian Ompunta Mulajadi nabolon.-

                                Saonari pe, Alu-aluhon ma tu sahala ni Ompunta Raja Batak,

                                Ompu naumpompar hita, sian Sianjur mula-mula,

                                Sianjur mulajadi, Sianjur Mulatompa,

                                Sianjur mula iyang, sianjur mula somba.-

Pargonsi :                M  a  n  g  a  l  i  n  g  -  l  i  n  g.

Paminta :                 Alu-aluhon ma nang tu Ompunta Raja Uti,

                                Uti na so ra mate, Uti na so ra matua,

                                Raja nahasaktian, Siraja Hatorusan,

                                Na torus marpangidoan, tu Ompunta Mulajadi Nabolon.-

Pargonsi :                M  a  n  g  a  l  i  n  g  -  l  i  n  g.

Paminta :                 Alu-aluhon ma muse tu sahala ni Ompu naumpompar hita,

                                Ompunta Limbung Mulana, nang Ompunta Jonggi Manaor,

                                Ompunta Ompu Sumundur, nang Guru Sandiang Bulan,

                                Na torus marpangidoan, tu Ompunta Mulajadi Nabolon.-

Pargonsi :                M  a  n  g  a  l  i  n  g  -  l  i  n  g.

Paminta :                 Mangido ma hita tu sahala ni angka Ompunta,

                                Asa ro nasida, mangaramoti manuturi hita,

                                Bahen ma Gondang Mula-mula i, mula gabe mula horas,

                                Mula ni Hasangapon, mula ni hagabeon.-

Pargonsi :                M  a  n  g  a  l  i  n  g  -  l  i  n  g.

               

               

2. GONDANG SOMBA-SOMBA.

*.  Manortor di ingananna be, huhut tangan marsomba

Paminta :                 Nungnga dibahen ho Amang, Gondang mula gabe mula horas,

                                Saonari uduti ma muse, tu Gondang Somba-somba

                                Asa luhut hita marsomba, tu Ompunta Mulajadi Nabolon

                                Dohot tu Debata natolu nang sahala ni angka Ompunta.-

Pargonsi :                M  a  m  b  a  h  e  n     G  o  n  d  a  n  g     S  o  m  b  a  -  s  o  m  b  a.-

3.

3 . GONDANG PINTA-PINTA (PANGIDOAN) NAPARJOLO.

o   Maniuk,   Manabei,  Mamohol Ulu.

a.       Maniuk(manjalo Pasu-Pasu sian julu ni tutur ima : Ompung Doli/Boru, Amangtua/Inangtua, Parsinuan/Pangintubu, Amanguda/Inanguda, Simatua Baoa/Boru, Haha Doli/Boru, Tunggane/Bao, Iboto/Eda,  Paramaan.-

b.      Manabei (manganpehon sabe-sabe tu abara/pasahat pasu-pasu tu talaga ni tutur ima : Anggi Doli/Boru, Anak/Parumaen, Amangboru/Namboru, Lae/Ito.-

c.       Mamohol Ulu (Pasahat pasu-pasu tu parsambubuan ni napinupus dohot Napinompar ima : Anak/Parumaen, Hela/Boru, Bere, Pahompu.-

Paminta :        Amang Panggual Pargonsi,

Nungnga tasomba Omputa Mulajadi Nabolon,

Nungnga tasomba Debata Natolu dohot Sahala ni Omputa,

Nuaeng sahat ma hita tu Gondang  Pinta – Pinta,

Maminta nauli maminta nadenggan dihita saluhutna.-

Songon naung pinatorang dimulanaa,

Tampak nau eng dison, Pinampar ni Ompunta Limbong Maulan,

Ndang mardia imbar, Anak  dohot Boru nang  Barena,

Satahi saoloan, manghabasi paste on.-

Saonari pe, , dihita sude Pinampor ni ompunta Limbong Maulana,

Hita saluhutna, Anak dohot Boru nang Barena,

Sada ma hita Amang, namardongan  sabutuha,

Martulang, Marboru, Marbere, dohot namarhula – hula.-

Saonari taparade ma rohanta, tu hata pardenggana,

Ia tung adong angka nasala, adong angka napipot,

Dinasala mangulahon, dinapipot manghatahon,

Sude nasala diari naung salpui, saonari ma I tahalupahon.-

Saonari taparade ma rohanta, tu hata pardengganan,

Ia tung adong angka nasala, adong angka napipot,

Dinasala mangulahon, dinapipot manghatahon,

Sude nasala diari naung salpui, saonari ma i tahalupahon.-

Asa pauk-pauk hudali mai, pago-pago tarugi,

Ia natading taulahi, ia nasega tapauli,

Asa gala-gala sitelluk, telluk mardagaul-gaul,

Sude nasala naung salpu, saonaari ma taapul-apul.-

Saonari ma hita masitopotan sala, saonari ma hita masijalangan tangan,

Saonari masipasaoran dame, masipatariparan holong ni hora,

Sotung adong be namanjua, marsimanat hita di uhum,

Ingkon marjea homa uhum do, Jolma sipeop roha hosom.-

Jujur mula ni parsalisian, bolus mula ni pardengganan,

Jadi unang be tajujur, angka hahurangan ni dongan ta,

Asa uang sai tubu parbadaan, unang sai tubu parsalisian,

Alai tabolushon mai sude, asa dapot pardengganan.-

Uli pe hata pintor, ulian do hata sae,

Tapasae ma saonari, luhut nasa ragam ni parbadaan,

Asa marsiboru puas, marsiboru bangkara,

Puas hita masijalangan, asa sae soada mara.-

Asa jumping ma dahita songon nidokhon ni umpasa,

Pege sangkarimpang, ansimun sada holbung,

Mangangkat hita rap tuginjang, manimbuk rap tu toru,

Tudolok tutoruan, masipairing-iringan,

Satahi saoloan, huhut masianju-anjuan.-

4.

Paminta :                Songon lampak ni gaol, sai masiamin-aminan,

                                Songon suhat dirobean, sai masitungkol-tungkolan,

                                Sada songon dai ni aek, ndang mardua songon udoro boning,

                                Asa monang hita maralo musu, alai talu  maralo dongan.-

        Songon hata ni silup – silupan ma dohononku  :

        Anian ma pagabe, tumondolhon sitadoan,

        Saut ma haita saur horas  jala gabe, ala olo hita masipaolo – oloan.-

Natorop :                E m m  a    t u t u                !!!!.

Paminta :             Amang panggual pargonsi, partarias namalo,

    Bean ma Gondang Parsahataan, Gondang  nalambok – lamboki,

    Asa sahata hami masianjuah, sahata hami masipaolonan,

    Asa dapot najinalahan, jumping nang naniluluan.-

    Tangkas baen gondang na i, on  upam  mambahen.-

Pargansi :            M a m b a h en     G o n d a n g    P a r s a h a t a a n

========================================================================

4. GONDANG PINTA – PINTA  ( PANGINDOAN)  NAPADUAHON.

                          *   Manortor  manarehon Ulos  manjolo pasu – pasu.

Paminta :         Saonari  tu hita  saluhut pinompar ni Ompunta  :

Taparade  ma rohanta, tapa tulus ma pingkiranta,

Satahi ma hita saoloan, sahata sapandohan,

Maminta pasu – pasu, sian Omputa Mulajadi Nabolon.-

Jadi dihita saluhutna.- saonari tapasahat ma pangidoanta,

Mangido sangap mangido tua, sian Ompunta Mulajadi nabolon,

Sada ma silompa godang, dua silompa ubi,

Nang pe holan ahu manghatahon, sude ma hita  dapotan nauli.-

Marrtonggo :     Hutonggo hupio hupangalu – alui ma huma ompung,

  De ompung Mulajadi Nabolon,

  Na jumadihon langit dohot Tano dohot nasa pagisian,

  Dohot na jumadihon hami jolma manisia.-

  Ho  do  Ompung, na jumadihon Ulu, ima simanjunjung,

  Ho  do  Ompung, na jumadihon  Mata, ima simalolong,

  Ho  do  Ompung , na jumadihon  Pinggol,  ima sipareon,

  Ho  do  Ompung, na jumadihon   tangan, ima simangido.-

  Ho  do  Ompung , napahombang  batuha,  jumadihon   siubeon,

  Ho  do  Ompung, napahombang pat, jumadihon simanjojok,

  Ho  do  Ompung, napahombang ate – ate, jumadihon silam – lamon,

  Ho  do  Ompung, napahibul pusu – pusu, jumadihon sibingkason.-

  Ho  do  Ompung    nasintak sumunde – sunde, nauja manotari,

  Namanektekhon Udan, dohot paro silas ni ari,

  Nautopap  sambubu nami, narumamping jari – jari,

  Somba  do ompung Jari sampulu, dihata marhuhuasai.-

  Tep – tep do Ompung Mula ni Gondang, ser  - ser  mula ni tor – tor,

  Ambit mula tuan, modom mula sonang,

  Siup mula tabas, sangkap mula ingot,

  Dung – dang mula Dudu, buhut mula ni Pollung.-

  Hutonggo  hami pe Ho Ompung, jala hupangalu –alui hami,

  Alai ndang nahapatupa hami Ompung, langgo haulian muna,

  Namangalu – alu do hami Ompung, pasahat pangidoan nami,

  Asi ma roham Ompung, mangaju ma  ho di hami.-

5.

Martonggo :            Dison da Ompung, hubahen hami do partonggoan nami,

                                Sian naung saria satolop hami, sa hata saoloan,

                                Pasahat Pangidoan napinarsinta ni rohanami,

        Mangido sigabe-gabe, mangido sihoras-horas.-

        Asa manatap manoggor martinangi marbinege ma hamu Ompung,

        Sian langit ni langitan, sian ginjang ni ginjangan,

        Sian langit na pitu tingka, sian ombun na pitu lampis,

        Sian pantil papituhon, Banjar parangin-anginan.-

Asa tuat ma hamu Ompung, sian toding Banua ginjang,

Sian Bintang namarjombut, tu lape-lape buluduri,

Sian mual situdu langit, tu gala- gala napulpulan,

Hariara sangkamedeha, Baringin tumburjati.-

Asa manumpak ho Ompung  ia dijolo, dipudi manghorasi,

Mambahen hami martua, mambahen hami gabe,

Asa lehon ma dihami anak namartua, na songon mataniari,

Dohot Boru namarsanggap, nauja manotari.-

Marangkup do Ompung nauli, mardongan do nadenggan,

Siangkupna songon nahundul, siudurna songon namardalan,

Asi ma roham Ompung, lehon ma nahuparsinta hami,

Tua sahala pasu-pasu, hasangapon hagabeon.-

Pasu-pasu ma hami Ompung, di hamoraon hagabeon,

Asa sinur napinahan namu, gabe nanula name,

Asa situmpur ni pakkat ma, tu situmbur ni hotang,

Tudia pe hami mangalangka, disi ma dapotan pangomoan.-

Pasu-pasu ma hami Ompung, di hahorason hasoparon,

Asa tambai ma dihami Ompung, Hapistaran habisukon,

Lehon ma dihami godang anak partahi jala ulubalang,

Dohot Boru parmas namalo marmeme.-

Asa songon hata ni silup-silupan ma dohononku :

Martumbur ma Baringin, martantan jabi-jabi,

Matorop ma hita maribur, songon Bintang manotari,

Horas hita jala gabe, tumpahon ni Ompunta Mulajadi.-

Natorop :             E  m  m  a    t  u  t  u  .  !  !  !

Paminta :             On pe amang Panggual pargonsi, bahen Gondang Mulajadi,

     Somba – somba pangidoan, tu Ompunta mulajadi Nabolon.-

     Tangkas bahen Gondang nai on upam mambahen.-

Pargonsi :             M  a  m  b  a  h  e  n    G  o  n  d  a  n  g    m  u  l  a  j  a  d  i.-

========================================================================

6.

5. GONDANG PINTA-PINTA (PANGIDOAN) NAPATOLUHON.

* manortor manarehon Ulos manjalo pasu-pasu.

Paminta :         Nungga hutonggo hupio hupangali- alui Ho Ompung,

Hutonggo muse ma namartua Debata,

Debata natolu, natolu suhu natolu harajaon,

Namanggomgomi langit dohot tano dohot Jolma manisia.-

Hutonggo ma Ho Ompung, Batara guru doli,

Batara guru panungkunan, Batara guru panisean,

Panungkuan ni Uhum, panungkuan ni poda,

Raja ni siahaan, mula ni hasolamon.-

Ho do Ompung, mula ni gantang tarajuan

Mula ni ampang siopat jual, mula ni solup siopat bale,

Mula ni parmasan, sisampulu dua solup.-

Parhatian sibola timbang, parninggala sibola tali,

Parpatik sijujung ni ninggor, paruhum sitingkos ni ari,

Tuginjang so ra mungkit, tu toru so ra monggal,

Tu aek so ra mengge, tu ari so ra mabiltak.-

Panantanan ho Ompung laho tu toru, hite-hite laho tu ginjang,

Silehon parhorasan pardinginan, dihami Jolma manisia,

Sipasindak panaili, sipaulak hosa loja,

Sipamok-pamok namarniang, sipangolu namarsiak bagi.-

Lehon ma dihami Ompung, Hahorason hasoparon,

Asa torop maribur hami, songon Bintang manotari,

Lehon ma dihami parhorasan pardinginan,

Asa horas tondi madingin, jojak tondi matogu.-

Sangon hata ni silup – silupan  ma dohononku :

Poltak ma Bulan tula, mangihut Bintang  sidong – dong ,

Horas ma hita luhutna, Ompunta Debata ma namargomgom.-

Natoro :               E    m  m  a      t  u  t  u  !!!!.

Paminta :         Nungnga hutonggo ho ompung,

Nuaeng hutonggo hupio hupangalu – alui ma Daompung Balasori,

Bala sori manjujung, Bala sori malela,

Manjujung do diulu, manjujung do di roha.-

Sori so haliapan sori so hapur – puran,

Sori pada di nauli, soripada di nadenggan,

Mula ni pulung – pulungan, mula ni ubat – ubatan,

Mula ni biti – bitian,  mula ni boto – botoan,-

Marlage – lage  tiar, disawan puti do urasna,

Pungga haomasan,  pambuatan ni tawarna,

Sibondut  buhu – buhu, sisobur daro mata,

Pagar pulung – pulungan panasintong ni podana.-

Ho Ompung, parhomintan tumpal pinarbulang,

Sisaktihon Harajaon, sisaktihon hasangapon,

Asa disi sahala, disi do hasangapon,

Disi sahala  Raja, disi do Hasingalon.-

Lehon ma dihami gondang anak partahi ulubalang,

Tambai anak nabisuk ana napistar, anak sibulang – bulangan,

Mamboan hami tudolok, asa dapot jampalan nalomak,

Mamboan hami tu toruan, asa dapot soburon nation.-

Asa sangon hata ni silup – silupan ma dohonanku   :

Sia diruma ma pongki, bahul – bahul ma pansalongan,

Sia diruma ma tondi, sai ro ma pansamotan.-

Natoro :               E    m  m  a      t  u  t  u      !!!!.

7.

Paminta  :        Nungnga hutonggo ho Ompung,

Nuaeng  hutonggo hupio hupangalu – alui ma Daompung Bela bulan,

Bala bulan matabun, bala bulan marubun,

Matabun dibonana, marumpun di punsuna.-

Parabulang tiga bolit, parabohom tonggong banua,

Partambantua nagodang, jala sibaganding  tua,

Parahoda sibaganding, parpiso mangan mangeluk,

Parahujut sidua ujung, parapodang sidua baba.-

Hundul digajadolok, marpiso solom debata,

Pantik do hujur sane, piso halasan di tanganna,

Parsisik narumanget – renget, marmatahon naso matana,

Marhuteptep  disangkalan, toba – toba di tolonanna.-

Sisaktihon Hamoraon, sisaktihon Hagabeon,

Sipasinur  napinahan, sipagabe naniula,

Sipamuli amporik tuasarna , sipalao satua tu ruangna,

Sipaulak gilok – gilok, tu tano ingananna.-

Asa lehon ma dihami Hamoraon hagabeon,

Sinur napinahan  nami, gabe naniula nami,

Lehon ma dihami Pansamotan, dalan ni pansaraian,

Lehon dalan ni Pangomoan, asa dapotan parsaulian.-

Asa songon hata ni silup-silupan ma dohononku :

Ba tingko ma inggir-inggir, tingko rata-rata,

Sude pangidoan pasu-pasu, pasauthon ma Ompunta Debata.-

Natorop :             E    m  m  a      t  u  t  u      !!!!.

Paminta :                On pe Amang Pamggual pargonsi, baen ma Gondang debata,

                                Asa tajalo pasu-pasu, sian Ompunta Debata,

                                Debata natolu, tolu suhu sitolu harajaon,

                                Debata Batara guru, Bala sori dohot Bala bulan.-

                                Bahen gondang nai, on upam mambahen.-

Pargonsi :                M  a  m  b  a  h  e  n    G  o  n  d  a  n  g    D  e  b  a  t  a.-

========================================================================

8.

6 . GONDANG PINTA-PINTA (PANGIDOAN) NAPAOPATHON.

*.  Manortor manarehon ulos manjalo pasu-pasu.

Paminta :                 Nungnga hutonggo hamu Ompung,

                                Nua eng hutonggo hupio hupangalu-alui ma Daompung Raju Uti,

                                Uti na so ra mate, Uti na so ra matua,

                                Sipalamak ate-ate, jala sidandan butuha.-

                                Ditongos duri-duri, holan palangki surtali,            

                                Ditongos horung-horung, holan batu pasagi,

                                Gajana gaja puti, Ulokna ulok dari,

                                Nagostang botohonna, narimpur jari-jari.-

                               

                                Hot ditano hasunsutan ni bulan, manganlindung dijabu parpunguan,

                                Nauja sandar nauja sorang, siraja hatorusan,

                                Natorus tu langit, natorus tu Debata,

                                Pasahat somba Iyang, tu Ompunta Mulajadi Nabolon.-

                                Hutonggo muse ma sahala ni Ompu naumpompar hami,

                                Pai sada pai dua, pai dua pai tolu,

                                Pai toulu pai opat, pai opat pai lima,

                                Pai lima pai onom, papituhon parsadaan.-

                                Ompunami siparmeme, siparorot pangulosi,

                                Pangajari panuturi, luhutna diramoti,

                                Diajari dituturi, Raja namarsahala,

                                Raja nahasaktian, silehon parhorasan pardinginan.-

               

                                Atik adong Ompung, natujolo tupudi songon pangambe ni paronan,

                                Napasintak patebur, songon parabit ni naso malo,

                                Asa hamu ma Ompung gundur pangalumi ansimun pangalambohi,

                                Diangka hahurangan nami, hamu ma Omoung manganlambok-lambohi.-

                                Patio ma Ompung dalan ni pansarian nami,

                                Asa tio songon mata ni mual, manarintar songon mataniari,

                                Pagabe ma naniula name, pasinur napinahan nami,

                                Horas tondi madingin, tumpahon ni Ompunta Mulajadi.-

                                Asa martanda ma Ompung songon dolok, marujung songon suriga,

                                Tanda pinasu ni Ulaonon, sude ma hami dapotan hinaulina,

                                Asi ma rohamuna Ompung, pasaut ma napinarsinta nami,

                                Uli ma rohamuna, mangoloi pangidoan name, O l o I   O m p u n g !!!.

                                Songon hata ni silup-silupan ma dohononku   :

                               

                                Sahat-sahat ni solu, sahat ma tu bontean,

                                Sude ma hita leleng mangolu, jala dapotan pasu-pasu panggabean.-

Natorop :                 E    m  m  a      t  u  t  u      !!!!.

Paminta :                On pe Amang panggual pargonsi,

                                Baen ma Gondang sampur marmeme,

                                Asa tajalo meme nauli, tajalo meme nadenggan,

                                Sian sahala ni Ompunta, dohot Ompunta Mulajadi Nabolon.-

                                Denggan baen Gondang nai, on upam mambahen.-

Pargonsi :                M a m b a h e n  G o n d a n g  S a m p u r  M a r m e m e.

========================================================================

 

9.

7 .  GONDANG HASAHATAN SITIO-TIO.-

*. Manortor manarehon ulos manjalo pasu-pasu.

Paminta :                 Amang Panggual pargonsi , partarias namalo,

                                Nang so huhatahon, nungnga sude diboto ho,

                                Antong bahen ma Gondang Hasahatan Sitip-tio,

                                Asa sahat ma nuali, sahat ma nadenggan, sude gabe tio.-

                                Asa songon hata ni silup-silupan ma dohononku :

                               

                                Turtu ninna Anduhur, Tio ma ninna Lote,

                                Sude pasu-pasu nauli, unang muba unang mose,

                                Ampe ma di sambubu, Tuak ma di abara,

                                Abing ma diampuan, Ompaonta tu tonga ni jabu.-

Natorop :             E    m  m  a      t  u  t  u      !!!!.

Paminta :             Bahen ma Amang, hasahatan Sitio-tio i.-

Pargonsi :            Mamabahen Gondang Hasahatan Sitio-tio.

Natorop :             H o r a s,          H o r a s,         H o r a s,  !!!!!!!!

=============================================================================================

    III.            G O N D A N G   N I   A N A K   N I   L I M B O N G.

               Tertib Acara diatur Panitia.

=============================================================================================

    IV.            G O N D A N G   N I   B O R U   N I   L I O M B O N G.

               Tertib Acara diatur Panitia.

=============================================================================================

      V.            G O N D A N G   N I   B E R E   N I   L I M B O N G.

               Terib Acara diatur Panitia.

=============================================================================================

    VI.            G O N D A N G   N I O N J A R   N I R O H A.

               Tertib Acara diatur Panitia.

=============================================================================================

  VII.            G O N D A N G   N A P O S O/G O N D A N G   P A N I M P U L I.

               Tertib Acara diatur Panitia

                P  a  n  i  m  p  u  l  i.

Paminta :                Amang Panggual pargonsi, partarias namalo,

                                Bahen ma Gondang Embas-embas, Gondang halalas ni roha,

                                Asa huembashon hami, hasadaon ni roha hami,

                                Manghalason Pasu-pasu, natajalo sian Ompunta Mulajadi Nabolon.-

Pargonsi :                M a m b a h e n  G o n d a n g  E m b a s – e m b a s.

Paminta :                 Mauliate ma Amang, nungnga dibahen ho Gondang Embas-embas I,

                                Saonari bahen ma Gondang Simonang-monang,

                                Asa sude hita monang maralo musu, alai talu maralo dongan.-

Pargonsi :                M a m b a h e n  S i m o n a n g  - m o n a n g.

Paminta :                 Nungnga huembashon hami Pasu-Pasu nauli pasu-pasu nadenggan,

                                Nungnga monang maralo musu alai talu maralo dongan,

                                Bahen ma Gondang Hasahatan Sitio-tio,

                                Asa sahat nauli sahat nadenggan, jala tio dihita saluhutna.-

Pargonsi :            M a m b a h e n  H a s a h a t a n  S i t i o – t i o.

Natorop :             H o r a s,          H o r a s,          H o r a s  !!!!!!!!!.

=======================================================================

                                                                                                                                                                                                                                                                                             LINDUNG LIMBONG