TURI - TURIAN

1.       Tangan do  Botohon, Ujung nai ma Jari – Jari,

Jari – Jari sampulu, Manang marsiganjang – ganjangi,

Godang hata sidohonon,  Jumolo Ahu marsantabi,

Ia tung adong annon humurang, Tondimu ma mangajari

.

2.       Hamu Amang Raja, dohot   Inang Soripada,

Ndang tarjua I Amang, pemasa nasoada sala,

Alai purpar pe pande dorpi, jumadihon tudimposna,

On ma pangidoan, tuhamu naumbegesa.

3.       Baliga do hubaligahon, Barita do Amang hubaritahon,

Turi - turian do huturianhon, jala tona do nahutonahon,

Torsa – torsaon, nungnga loja Ahu papunguhon,

Asa sude naumbegesa, dohot marsaulihon.

4.       Angka Torsa – torsion, adong jinaha sian Buku,

Adong tona ni Amanta, dohot tona ni angka Ompu,

Ungang leas roham, ai ringkot do botoonmu,

Asa boi turihononmu, tu angka anak dohot pahompu.

5.       Sianjur Mula – mula, I do Sianjur Mula tompa,

Sianjur Mulajadi, Mulajadi ni Ompunta,

Ompunta Raja Batak, Ompu naumpompar hita,

Mula huta ni Raja Batak, ima Sianjur Mula – mula.

6.       Mula ni jolma tubu, mula ni halak marmarga,

Mula ni Odung – odung, mula ni jalma marhata,

Mula ni angka Pollung, mula ni angka  Umpasa,

Mula ni angka Tonggo, mangido Asi sian Ompunta.

7.       Mula ni Ruma Ijuk, mula ni Ruma Gorga,

Hambirang jabu Suhat, disiamum Jabu bona,

Mula ni halak marbisuk, mula ni halak  marroha,

Tangi di Sipodaon , huhut irit mengingot Tona.

8.    Mula ni Biti – bitian, mula ni Tawar namarsahalaa,

Mulu ni Hadatuon, dohot manompan sibiaksa,

Mula ni Parhalaan, mula ni Tabas na marhata,

Mula ni Surat Lak – lak, mula ni sijaha Raksa.

9.       Mula ni Uning – uningan, mula Taganing namarhata,

Ogung marsialusan dohot Sarune marhata –hata,

Hesek dohot Odap napatoba soarana,

Manortor ma antong Amanta Raja, dohot Inanta Soripada.

10.       Tor – tor Mula Gondang, ima Gondang mula – mula,

 Tor – tor paduahon, ima Gondang Somba – somba,

 Tor – tor patoluhon, ima Gondang pinta – pinta,

 Maminta huhut marsomba, tu Mulajadi nang tu Ompunta.

11.   Barita ni Ompunta, manang Tarombo ni Marganta,

Mangihuthon Turi – turian, Torsa – torsa dohot tona,

Sian Si Raja Batak, lopus nuaeng sahat tu hita,

Tangkas ma ihut – ihut hamuma, saonari asa hupatota.

12.    Ompunta  Raja Batak, ndong songon hita pantubuna,

Anggo mangihuthon barita, Tantan Debata do Ibana,

Boru  Deak Parujar, dohot si leang naguratta,

I do pataru Ibana tu Sianjur Mula – mula.

13.   Ompunta Raja Batak, holon dua do anakna,

Guru Tatea Bulan ma, dohot si Raja Toga Sumba,

Sian Sianjur Mula – mula, tu parik Sabungan ma Hutana,

Sude do Marga Batak, naduaon ma perserahanna.

14.      Anak ni Raja Batak, Guru Tatea Bulan buha buha bajuna,

          Tuan Sori Mangarata, ima Goar harajoanna,

          Lima sinuan tunasna, jala lima sinuan beuna,

          Parsadaan ni Pomparanna, Naimarata ma goarna.

15.   Raja Uti, Saribu Raja, Limbong Mulana, Sagala Raja,

Palimahon Silau Raja, ima anak ni Ompunta,

Boru Pareme, Bunga Haomasan, Biding laut, Anting Haomasan,

Nantinjo ma palimahon, ima boru ni Ompunta.

16.      Anak ni Guru Tatea Bulan, Raja Uti ma pahi sada,

          On ma Raja nahasaktian, jala Raja namarsahala,

          Sotung unang hita lupa, Sitorop pinompar do Ibana,

          Rantingna do dangkana, pinompar ni Anggina do pinompar ni hahana.

17.   Ompu Tuan Raja Doli, manang si Saribu Raja,

On ma pahi dua, anak ni Tuan Sori Mangarata,

Ia Saribu Raja tung ganjang do baritana,

Di Desa naualu, mangarerak do pomparanna.

18.      Ompunta Saribu Raja, dohot Boru Pareme Namborunta,

                                      Maporhas do i sorang, sada baoa sada borua,

                                      Songon i ma jolo tingkina, songon i ma pangalohana,

                                      Masa ma naso uhum, ala gabe targabora.

19.   Sar ma baritana, pur ma alu-alu,

Marpingkir ma  Saribu Raja, borhat ma Ibana sian jabu,

Marpungu ma anggina, Limbong,Sagala dohot  Malau,

Mandok nasida natolu, Ia Saribu Raja ingkon leleon dao tu jau.

20.      Laho ma Saribu Raja, tu atas ni Sibungbung ruma,

          Tu dolok Batu nanggar, disi ma Leleng  manopa-nopa,

          Sirang ma nasida, namaranggi namarhaha,

          Ala Saribu Raja, nungnga tarboan-boan rohana.

21.   Alai Si Lau Raja, diparroha do rohana,

Marmutik , ma rohana, dung sahat di Sibungbung ruma,

Ditunjang Ibana tano I gogo, jalak didok ma nang hatana,

Hei, nungnga sala ho Tano, padoa asa unang marmara.

22.      Borhat ma Saribu Raja, tu Pangarantoanna,

          Sian si Batu Nanggar, tu harangan rimbunrea,

          Godang ma antong hutama, godang nang pomparanna,

          Parsadaan ni pomparanna, Borbor marsada ma goarna.

23.   Ia Boru Parame, disol-soli ma dirina,

Borhat  ma Ibana, mangire-ire tu dangsina,

Tu luat Sabulan, di Uludarat ma adina,

Disi ma Ibana mian, paima sahat gok tingkina.

24.      Hum ma di ariana, gok nang di bulanna,

          Sorang ma dakdanak, alai asing otik rumangna,

          Marimbulu songon Babiat, martompa songon Jolma,

          Ia dakdanak I, si Raja Lontung  ma goarna.

25.   Ia si Raja Lontung, di sada liang do sorangna,

Babiat sitelpang do, pataru-taru allangonna,

Ia di sada tingki, dipangangang Babiat i ma pamanganna,

Hape naung solot do, holi-holi dohot juhut di tolonanna.

26.   Dung balga ma Raja Lontung, disungkun ma Inangna,

Di dia Paribanna, dohot huta ni Tulangna,

Alai Boru Pareme, tumangtangis ma Ibana,

Didokhon ma tu anakna, songon  on ma ia hatana.

27.      Pariga-riga bulung ho Amang, pariga-riga bulung gaol,

          Pasigat-sigat lungun ma ho Amang, pasigat-sigat hinadangol,

          Mapultak sian bulu do Inangmon, madek-dek sian langit,

          Marsada-sada bulung, marsikkor-sikkor di nahansit.

28.   Alai nang pe songon i, on ma hata ingotonmu,

Molo naeng ma luluanmu, pinaribot ni Inangmu,

Ditoru ni Pusuk Buhit, disi do huta ni Tulangmu,

Molo laho ho tusi, nangkok tuat do bolusonmu.

29.      Boru ni Tulangmi, songon ahu do rupana,

          Topot ma Ibana tu Paranggir-anggirananna,

          Boan ma Tin-tin on, pasahatonmu tu Ibana,

          Jala ingkon pas do tintin on, tujari-jari ni tanganna.

30.   Borhat ma Raja Lontung, manopot huta ni Tulangna,

Marhire-hire dolok , nangkok tuat ma dalanna,

Alai Boru  Pareme, dipahipas  ma langkana,

Jumolo ma antong Boru Pareme sahat, tu par-anggir-anggiranna.

31.      Dung sahat ma raja Lontung, tu huta ni Tulangna,

          Tuhuta ni Tulangna, natinonahon ni Inangna,

          Dibereng ma Paribanna, di paranggir-anggir an na,

          Hundul diatas batu, songon tona ni Inangna.

32.   Didokhon Raja Lontung ma, hatana tu Paribanna,

Alai antar manjua paribannai, Jala didok ma ndang ditanda,

Mandok ma Raja Lontung, Tintin on ma sada tanda,

Molo boru ni Tulangku, ingkon pas do tu tanganna.

33.      Jadi ditait Raja Lontung ma, tangan ni boru ni Tulangna,

          Dipamasuk ma tintin i, tu jari-jari ni tanganna,

          Pas atong tintin i, tung so adong otik hurangna,

          Songon I ma pardalanna, di oli ma muse Inangna.

34.   Manompar ma Raja Lontung, dohot naung boru ni Tulangna,

Pitu ma anak na, Jala sada ma boruna,

Goar ni Pomparanna, Lontung si Sia sada Ina,

Pasia boruna,Sihombing dohot Simamora.

35.      Sibunga Haomasan, manang si Boru Anting sabungan,

          On ma pahi dua boru ni Guru Tatea Bulan,

          Ia uli rupana, pas do hira songon bulan,

          Tu anak ni Sumba, Namboru on marhamulian.

36.   Ia sipahi tolu, boru ni Guru Tatea Bulan,

Si boru Biding Laut, alai ndang marhamulian,

Ia namboruon, nungnga gabe hasaktian,

Margoar Borutunghau, diharangan do maringan.

37.   Boru sipahi Opat, ima si Anting Haomasan,

Tu marga Saragi do, Namboruon marhamulian,

Barita namandok, nang dohot turi-turian,

Ia namboruon, Dua  pungga saparihotan.

38.      Nantinjo Namborunta, On ma boru siampudan,

          Boru ni Ompui, Ompu Guru Tatea Bulan,

          Ia namboruon, palobi do Turi-turi an,

          Di Tao Toba do ingananna, Nungnga gabe hasaktian.

39.   Anak ni Guru Tatea Bulan, pahi opat Sagala Raja,

Dipungka ma Hutana, disada luat dingkan utara,

Goar  ni huta I, saonari Huta Sagala,

Goar ni Pomparanna pe, hot do tong Marga Sagala.

40.      Ompungta Siampudan, Ompui Silau Raja,

          Mangaranto do Ibana, songon hahana Saribu Raja,

          Borhat tu Samosir, disi dipungka ma Hutana,

          Sian Ambarita sahat tu urat, Marsolotan huta dohot golatna.

41.   Saonari  patorangon ma, barita ni Limbong Mulana,

Tu hita pinomparna, dohot Boru nang Berena,

Ndang mardia imbar, sada do hita luhutna,

Saonari asa hupatorang, asa tangi-tangi hamu ma.

42.      Ompunta Limbong Mulana, holan dua do anakna,

          Papaluan naonggang, on ma anak buha bujana,

          Ompunta Langgat Limbong, on ma anak pahi dua,

          Mian di huta Limbong, Bariba huta dohot Bariba huta.

43.   Papaluan Naonggang, opat ma ia anakna,

Ompu Borsak ni Laingan, hasudungan ni rohana,

Raja Sori, ima goar harajaon najinujungna,

Manbahen ademahon ni Luat, ima ulaonna.

44.      Ompu Tuan Ruma Ijuk, Najinou pahi dua,

          Raja Nasia pulu, ima somal panggoarina,

          Raja Parradum, Ima goar Harajaon najinujungna,

          Manontuhon tok-tok ripe, ima ulaonna.

45.   Siraja Naburahan, Manang Tuan Pande Nabolon,

Anak ni Papaluan Naonggang, on ma anak patoluhon,

Pungga-pungga,Hinanjar,Sangge,Parruji,naopat on ma di ulahon,

Tingki masa Hoda Somba, manang mangan Horbo Sombaon.

46.      Si Raja Naopatpulu, manang Ompu Sodompahon,

          On ma anak siampudan, manang anak paopathon,

          Pinompar ni Papaluan Naonggang, Siopat turpuk mai goaron,

          Sisada hata sisada roha, molo masa ni ulaon.

47.   Ia si Langgat Limbong, tolu ma ia anakna,

Tuan Jonggi Nabolon, on ma anak buha bajuna,

Sidaguruk Panggoarina, Jonggi Manaor Harajaonna,

Martongggo jala Uluan Bius, ima ulaonna.

48.      Ompu Raja Nabimbinan, on ma anak pahi dua,

          Raja Toga Sihole, ima somal panggoarina,

          Raja Mamontang Laut, harajoan najinujung na,

          Mangaramothon Hoda Somba, ima ulaonna.

49.   Ia sipahi tolu, Papaga Nalomak ma goarna,

Si Toga Habeahan, ima somal panggoarina,

Raja Paor, ima harajaon najinunjung na,

Patotahon dalan tingki pasahat somba, ima ulaon na.

50.      Papaluan Naonggang, Siopat turpuk digoari,

          Ia si Langgat Limbong, sitolu turpuk digoari,

          Patuduhon hasadaonna, digoari sipitu tali,

          Sada Bius sada Ulaon, tong-tong mardos ni tahi.

51.   Ia sipitu tali, adong be ganup turpukna,

Adong be ganup hutana, adong be harajaonna,

Tigor parbalohanna, songon tanda ni golatna,

Alai anggo Margana, Limbong Mulana do luhutna.

52.      Ompu Borsak, Nasia pulu, Naburahan, Naopat pulu,

          Sidaguruk, Toga Sihole, dohot Toga Habeahan,

          SiPitu talion, marsada roha saulaon,

          Tingki mangan hoda somba, horbo bius nang horbo sambaon.

53.   Diganup-ganup turpuk, manang suhe ni partuhu,

Ganup mar Raja Jolo, songon uluan diulaon marsintuhu,

Adong Pangulu Raja, patota Horbo Sombaon tingki mandudu,

Adong Raja Parhara, mamaritahon ma on di suru.

54.      Ia molo masa Tungko, ima Rapot Tonggo Raja,

          Di Partungkoan I, Jonggi Manaor mamungka hata,

          Denggan marsiarisan, namar anggi namarhaha,

          Papaluan Naonggang tu Langgat Limbong, marsiarisan do dihata.

55.   Mamungka hata Jonggi Manaor, diarishon tu Raja Sori,

Raja Sori mangarishon, tu anggina Mamontang Laut,

Sian Raja Mamontang Laut, tu hahana Raja Parradum,

Parradum mangarishon, tu anggina Raja Paor.

56.      Papaluan Naonggang, dohot anggina Langgat Limbong,

          Sai masitariparan, masiarisan di angka Pollung,

          Masialus-alusan, Papaluan Naonggang tu Langgat Limbong,

          Sian si Langgat Limbong, mulak tu Papaluan Naonggang.

57.   Najolo huta Limbong, tarbarita do goarna,

Adong Batu Hobonna, Sipitu Dai antong Mual na,

Sahali do mangula, dua hali pariama,

Rarak do pinahan na, tung maduma pangisina.

58.      Haporseaon ni Ompunta naparjolo, Tolu Debata Nabolon,

          Debata Batara Guru, ima Mulajadi Nabolon,

          Debata Mangala Bulan, ima Ompu Silaon Bolon,

          Debata Asi-asi, ima Tuan Pane Nabolon.

59.   Ompunta naparjolo, pajongjonghon patik na arga,

I ma Dalihan Natolu, I do patik naumbalga,

Manat Mardongan Tubu, Somba marhula-hula,

Elek ia marboru, asa horas unang mahua.

60.      Patik dohot Ugari, napimungka ni Ompunta,

          Mar Siunang tu dakdanak, marsitongka tu Natua-tua,

          Pantun do Hangoluan, Jala tois hamagoan,

          On do natau ojahan, ruhut-ruhut ni hangoluan.

61.   Peak Adat, tung so jadi do gulingon,

Jong – jong Uhum, tung so jadi do tabaon,

Natinaba ni tangke, martumbur  paimaon,

Alai natinaba ni gana, gabe apus do sipaimaon.

62.      Naung pinarik i, tung si tongka do  tolbak on,

          Naung hinandang i, tung sitongka do tas – tas on,

          Naung indahan i, tung si tongka  do dudaon,

          Naung ni unduk I, tung si tongka do jua on.

63.   Togu Urat ni Ri, toguan Urat ni Padang,

Togu nidok ni Janji, toguan ni dok ni padan,

Dangke ni sabulan tu Tonggina tu Tabona,

Manang Ise si ose padan, ingkon tu ripurna, ingkon tu magona.

64.      Panguan limbong Mulana, Boru Bere saluhutna,

           Hira dua ratus Rumah Tangga, di Medan on hita  sahuta,

          Sada ma hita Amang, luhutna, Na maranggi na marbaha,

          Martulang Marboru, dohot Namarhula – hula.

65.   Gurampang Nabolon, mian di julu ni Tapian,

Molo soada roha holong, sai tubu do parsilisian,

Adong pe sipanganon natabo, ndang boi marsipiringan,

Tung sura hahurangan, ndang, boi marsisalian.

66.      Nang pe sahundulan, alai marsipudian,

          Padugus pe tanggurung, ndang masipangkulingan,

          Sai  tong marsirehean, mandok sihagigian,

          Sursar ma dohot Ulaon, mago parsaulian.

67.   Hape molo gok holong, dao ma parsalisian,

Satahi saoloan, ndang marsipasidingan,

Songon Lampak ni gaol, marsiamin – amin an,

Songon suhat di robean, sai marsitungkol – tungkol an.

68.      Tu dolok tu toruan, masipairing –iringan,

          Jumpa sitaonon, tong – tong marsiasian,

          Gabe ma naniula, dor ma pansarian,

          Dao ma abat –abat, ro ma parsaulian.

69.   Binanga ni Sihombing, binongkak ni Tarabunga,

Tu sanggar ma Amporik, tu Lombang ma Satua,

Sinur ma napinahan, manggabe na niula,

Hiras na di balian, horas ma nang  di huta.

70.      Simbur magodang ma dakdanak, songon ulluson pura – pura,

          Angka naung marsikkolo, lam tu tambana ma majuna,

          Tu angka na  kuliah, sai hatop ma di wisuda,

          Naung tammat marsikkola, hatop ma dapot karejona.

71.      Angka naung karejo, lam tu timbona ma pangkatna,

          Angka dongan namanganggur, tiba ma ro pandaramanna,

          Angka partiga – tiga, said dor pangomoanna,

          Angka pardalan – dalan, sai jumpang ma niluluanna.

72.   Angka naung  tang umurna, tibu ma ro sirongkap ni todina,

Angka naung mar rongkap, hatop mardangka tanggurungna,

Angka naung magodang, sai peng – peng laho matua,

Angka natua – tua, sai sahat ma saur matua.

73.      Songon hata ni umpasa, on ma hata pangidoan,

          Anian ma pagabe, tumondolhon sitadoan,

          Na nia ma hita horas  jala gabe, molo masipaoloan,

          Sude marlas ni roha, jala dapotan pangomoan.

74.   Tubu ma Dingin – dingin, diholang ni simartolu,

Horas ma tondi madingin, jojak tondi matogu,

Manumpak ma Mulajadi, leleng be hita mangolu,

Gomos ma ma hita mar tuhan, asa di surgoi hita dapotan ngolu.

75.      Sititik sigompa ma, golang – golang pangarahutna,

          Tung otik pe naung hubanen tupa, sai godang ma pinasuna,

          Adong hurang lobi, marpanganju ma hamuna,

         Saonari hupasadi, Mauliate ma di hamuna.

                                                                          Medan, 06 Juli 2017

                                                                                Napatupahon.

                                                                        LINDUNG LIMBONG

Download